Prentsarako aurkezpena

...eta gauetik, euria nobelari buruzko elkarrizketa Eguzki irratian

 Pasaden ostiralean Eguzki irratiko Pasealekun, primitzian ...eta gauetik, euria nobelari buruzko lehen elkarrizketa.

Ekhiotz handiarekin, Pasealekuko esataria.

Gauetik etorritako ohorezko guardia

Poema baten bidaia

 Atzo, 2023ko azaroak 23, Nafarroako liburutegi nagusian, Aislinn eta bion arteko elkarrizketa izan genuen, Zerokotan elkarteko lagunen eskutik. Arratsalde atsegina izan zen, rock eta poesiaz hizketan. Oso gustora, portzierto.

 

 

Bukaeran galdera bat egin ziguten, ea zer gertatzen den poema bat kanta bihurtzean, eta nire poema baten bidaia etorri zitzaidan burura. 

German Rodriguez oroitzeko ekitaldietan erabiltzeko poema bat eskatu zidaten eta hauxe idatzi nuen: 

Odola eta sua:

areazko amesgaiztoa

beldurraren munizioan

 

izenik gabeko balak

zigorrik gabeko errudunak

justiziarik gabeko herria

 

odola eta sua:

areazko ekaitza

oroimenaren hilketan

 

izenik gabeko balak

zigorrik gabeko errudunak

justiziarik gabeko herria

 

odola eta sua:

areazko hitzak

isildutako hilketan

 

hilarri debekatuaren balak

zure kopeta zulatzen jarraitzen du oraindik

erori zinen leku berean

 

izenik gabeko balak

zigorrik gabeko errudunak

justiziarik gabeko herria

 

erretinan daramagun

zuri-beltzezko argazki bat zara

bihotzean eramango dugun

krabelin gorri bat zara

eta maite zintuen hiriak

nahi du orain, german,

zure iraultzen irria

zure oroimenaren hilarria

 Handik gutxira Fermin Valenciak eta Mikel Elizagak nire poema musikatuko zutela esan zidaten, beraz, poeman aldaketa batzuk egin behar izan ziren: 

 

Aldaketa txikiak egin eta poemak bere bidaia egin zuen, eta Mikelek eta Ferminek doinu ederra eman zioten. 

Gerora, duela gutxi, kanta bat entzuten ari nintzen eta ohartu nintzen nire letra zela, baina oraingo honetan ska doinuetara eramanda, Skabidean taldearen eskutik. 

Hori bai, talde honek ez dit aipatu ere egin, letraren egile gisa, baina tira, pozik egon naiteke poemaren bidaiak jarraitu egin duelako eta ska doinuetan ere eder entzuten delako. Eta hausnarketa polita iruditu zait egunen batean idatzi diren hitzak nola bidaiatzen duten ikustea. 

Poesia eta rocka, solasaldia

Zerokotanen lagunen gonbidapena onartu eta sarao honetan arituko gara. Ea zer ateratzen den. 
 

 

KomikiBoomen marrazkilari txikiak handi bihurtu ziren!

 Antsoingo Komikiboomen egon ginen, eta txikiak marrazkilari handi bihurtu ziren. Pertsonaia eta lan ederrak sortu zituzten eta primeran pasa genuen. 

Eskerrik asko Antsoain eta hurbildu zineten guztioi!

KASU! Ordu txikitan erosteko salmenta puntu berriak! 

Iruñeko Alde Zaharra: 

- Karrikiri. 

- Katakrak. 

- Abarzuza. 

 

Zabalgunea: 

 

- Chundarata. 

Txantrea: 

- Ezkaba paperdenda. 

- Izadi.

- Zazpi okindegia.

 

Erripagaña: 

 

- La Veleta.

KomikiBOOM!

Aste honetan KomikiBoomaren laugarren edizioa jarriko da martxan. Ilustrazio sozialaren jardunaldiak dira. 

Irantzu eta biok bertan egongo gara, elkarrekin egin dugun gure lan berriarekin: Ordu txikitan. Ostiralean, otsailak 10, arratsaldeko 6etan tailer bat eginen dugu, pertsonaiak sortzeko eta pertsonaia horiekin mikroistorio bat sortu eta fanzine batera eramateko. Tailerra egiteko gure istoriotxoan oinarritu gara. 

Pertsonaia iletsuak sortuko ditugu eta paperarekin eta errotulagailuekin ere jolastuko gara: irudimena, sormena, marrazketa, eskulanak, jolasa... 

Adin guztietako "haurrak" etor daitezke, familiak ere ongietorriak, baina ideia bat egitearren, adin gomendatua 8-12 urtekoak dira, gutxi gora behera. 

Ordu txikitan album ilustratua da, guk geuk autoeditatua. Bertan gaueko pertsonaiekin bidaiatzen dugu, eta gauarekin batera isiltasuna, lasaitasuna edota iluntasuna, besteak beste, usaintzeko aukera daukagu. Gaur egun subertsio hutsa. Album ilustratu soziala. Horregatik uste genuen Antsoainen egon behar ginela. Horregatik egongo gara. 

Asko poztu ginen bertan egoteko gonbita bidali zigutenean. Gainera, KomikiBoom Iruñeko periferian sortutako ekimen kultural ederra eta interesgarria dela iruditzen zaigu. Urtez urte jarraitu dugu, beraz, plazera da orain bertan ere parte hartzeko aukera izatea. 

Txantreako Brif-braf-brufen ere egon ginen eta esperientzia ederra izan zen. Antsoaingoa ez da gutxiago izango. 

Gure albuma bertan erosteko aukera ere egonen da. 

Bestela ere, gaur egun Txantreako hainbat dendatan eros daiteke, banaketa guk geuk egina: 

- Ezkaba paper denda. 

- Izadi liburu-denda. 

- Zazpi okindegia. 

Eta aste honetan berean ere Iruñeko Aldezaharrera iritsiko da (Karrikiri, Katakrak...). 

Informatzen jarraituko dugu. 

2023ko otsailaren 6a, Gauaren leku ezezagun batetik.