Durangokoa eta gero, Txantreako aurkezpena iritsi da. Edo hobe esateko, "ekintza fonikoa". Jai Batzordeak auzoko jai txikien egitarauan sartu gaituzte.
Euskalduon Biltokin elkartu gara eta elkartea berehala bete da. Auzokoak, lagunak, lagunen lagunak, lankideak, idazkideak...
Leirek Biltokiren izenean hitz egin du. Gero, Kakok bere sarrerak egin ditu, eta hainbat anekdota ekarri dizkigu gogora. Barregarria bezain hunkigarria. Ederra. Etxeko giroan.
Eta tartean, BlekingeKale Banden taldearen eskutik musika. Gorka, Rober eta guk geuk. (Saul falta zitzaigun). Libürügailü baten aurkezpen-ekintza fonikoa izan da, komunitateak edo tribuak (berriro ere) babestuta. Gora zuek! Non hobe? Non hobe auzoan baino?
2023ko abenduak 9, Durango city. Txantreako espedizioa musikarien aldetik sartu da azokara. Binilo eta kaseteen artean eroso mugitu gara. Eguerdian Plateruenera hurbildu eta jendez gainezka dagoenez, ezin izan gara sartu, eta ilaran geratu gara, ate ondoan. Handik, atetik, ikusi behar izan dugu Leihotikan taldearen kontzertua.
Arratsaldean Pamielaren standera agertu, Jose Anjel Irigarayrekin elkartu eta Ahotseneara hurbildu gara. Ahotsenean gure aurretik Miren Agur MeabeItzulerak, bere azken eleberria aurkezten ari da. Gu, gure tribuaren lagun eta familiekin geratu gara atean.
Jendetza atera da eta gu sartu. Familiak, alabak, argitaletxekoak, handik eta hemendik hurbildutako lagunak eta aurreko aurkezpenetik geratu diren pertsona batzuk ere.
Gotzon Barandiaran, idazlea, lagun eta Ahotsenearen antolatzaileetako bat agurtu eta "eszenatokira" igo gara: Jose Anjel Irigaray, Kako eta Hirurok.
Jose Anjelek sarrera orokorra egin du. Kakok palestinako bandera atera eta, kontzertu batean egonen bagina bezala, bere "hiru kanta", hiru anekdota-edo kontatu ditu. Ondoren nik neuk ...eta gauetik, euria liburuaz hitz egin dut. Dena ordu erdi batean konprimituta, baina ederra izan da lagun horien guztien aurpegiak, irribarreak eta konplizitate keinuak ikustea. Ikaragarria.
Durangon gaude, Ahotseneako eszenatokian, eta literaturaz hizketan ari gara, gure modura beti ere, gure estilora.
Aurkezpenaren ondoren, Jose Anjelek aipatu dit Pamielako standera joateko, bertan sartzeko eta, gutxienez, presentzia izateko. Hara abiatu gara eta, sartzerakoan, Joseba Sarrionandia eta Jose Mari Agirretxe bertan daudela ohartu naiz. Ilusio handia egin dit haiekin momentu eta espazio hori partekatzea eta argazkia egiteko eskatu diet. Standaren beste aldean nire tribukoak ikusteak ere ilusio handia egin dit: Kako, Leire, Sua eta Kattalin. Xiana, Iria eta Laia. Lontxo. Exprai, eta gainontzekoak.
Handik gutxira Bernardo Atxaga agertu eta bera ere standera sartu da. Ez dakit ze astroak elkartu diren gaur Durangon, baina ni izarrez inguratuta etorri naiz auzotik eta izarrez inguratuta ikusi dut nire burua, han barruan ere.
Atxagarekin liburuen trukaketa egin dut. Nik Paradisuaren kanpoko aldeak sinatuta eraman dut, eta berak ...eta gauetik, euria eraman du. Atxaga ederki ongi gogoratzen zen behin Erlea aldizkarirako idatzi nuen narrazio laburraz, eta horretaz ere solastu gara. Ondoren, hainbat liburu sinatu ondoren, alde egin du eta Sarrionandiarekin geratu naiz, Markos Gimenoren liburuaz hizketan, besteak beste.
Nik hiru liburu sinatu ditut, besterik ez, baina oso tarte atsegina eta bitxia izan da.
Standetik atera eta Durangoko eurira atera gara, eta tribukoekin batera Gernikaraino joan gara, afari goxo batekin gaua ixteko....
Irakurle klub irekia
MENDEKO BORROKAtik …ETA GAUETIK EURIAra
Larraintzar
18:00 Abenduak 1, ostiralean
Ultzamako irakurle taldean Mendeko borroka nobela irakurri berri dute. Aitzakia horrekin ostiral honetan solastuko gara eta, bide batez, labetik atera berri den ...eta gauetik euria eleberria aurkezteko probestuko dugu.
Topaketa zabalik dago hurbildu nahi duenarentzat.
Udalaitz mendira Mendeko borroka eraman zuteneko irudia
2023/11/27
Gitarrak zorroztu genituen euria egin arren
akordeetan bilatuz askatasuna zenbatean dagoen
azoka guztietan galdezka
betazalak bihotzez josi ditugu
baina alanbradak gure urratsak moztu ez ezik
historia berari
hesiak
jartzeko asmoz herdoildu zituzten
askatasuna hitza
ederra da bai
benetakoa izango den galdetzen diot ene buruari
Atzo, 2023ko azaroak 23, Nafarroako liburutegi nagusian, Aislinn eta bion arteko elkarrizketa izan genuen, Zerokotan elkarteko lagunen eskutik. Arratsalde atsegina izan zen, rock eta poesiaz hizketan. Oso gustora, portzierto.
Bukaeran galdera bat egin ziguten, ea zer gertatzen den poema bat kanta bihurtzean, eta nire poema baten bidaia etorri zitzaidan burura.
German Rodriguez oroitzeko ekitaldietan erabiltzeko poema bat eskatu zidaten eta hauxe idatzi nuen:
Odola eta sua:
areazko amesgaiztoa
beldurraren munizioan
izenik gabeko balak
zigorrik gabeko errudunak
justiziarik gabeko herria
odola eta sua:
areazko ekaitza
oroimenaren hilketan
izenik gabeko balak
zigorrik gabeko errudunak
justiziarik gabeko herria
odola eta sua:
areazko hitzak
isildutako hilketan
hilarri debekatuaren balak
zure kopeta zulatzen jarraitzen du oraindik
erori zinen leku berean
izenik gabeko balak
zigorrik gabeko errudunak
justiziarik gabeko herria
erretinan daramagun
zuri-beltzezko argazki bat zara
bihotzean eramango dugun
krabelin gorri bat zara
eta maite zintuen hiriak
nahi du orain, german,
zure iraultzen irria
zure oroimenaren hilarria
Handik gutxira Fermin Valenciak eta Mikel Elizagak nire poema musikatuko zutela esan zidaten, beraz, poeman aldaketa batzuk egin behar izan ziren:
Aldaketa txikiak egin eta poemak bere bidaia egin zuen, eta Mikelek eta Ferminek doinu ederra eman zioten.
Gerora, duela gutxi, kanta bat entzuten ari nintzen eta ohartu nintzen nire letra zela, baina oraingo honetan ska doinuetara eramanda, Skabidean taldearen eskutik.
Hori bai, talde honek ez dit aipatu ere egin, letraren egile gisa, baina tira, pozik egon naiteke poemaren bidaiak jarraitu egin duelako eta ska doinuetan ere eder entzuten delako. Eta hausnarketa polita iruditu zait egunen batean idatzi diren hitzak nola bidaiatzen duten ikustea.
Aste honetan KomikiBoomaren laugarren
edizioa jarriko da martxan. Ilustrazio sozialaren jardunaldiak dira.
Irantzu eta
biok bertan egongo gara, elkarrekin egin dugun gure lan berriarekin:
Ordu txikitan.
Ostiralean, otsailak 10, arratsaldeko 6etan tailer bat eginen dugu,
pertsonaiak sortzeko eta pertsonaia horiekin mikroistorio bat sortu eta fanzine
batera eramateko. Tailerra egiteko gure istoriotxoan oinarritu gara.
Pertsonaia
iletsuak sortuko ditugu eta paperarekin eta errotulagailuekin ere jolastuko
gara: irudimena, sormena, marrazketa, eskulanak, jolasa...
Adin guztietako
"haurrak" etor daitezke, familiak ere ongietorriak, baina ideia bat egitearren,
adin gomendatua 8-12 urtekoak dira, gutxi gora behera.
Ordu txikitan album ilustratua da, guk geuk autoeditatua. Bertan gaueko
pertsonaiekin bidaiatzen dugu, eta gauarekin batera isiltasuna, lasaitasuna
edota iluntasuna, besteak beste, usaintzeko aukera daukagu. Gaur egun subertsio
hutsa. Album ilustratu soziala. Horregatik uste genuen Antsoainen egon behar
ginela. Horregatik egongo gara.
Asko poztu ginen bertan egoteko gonbita bidali
zigutenean. Gainera, KomikiBoom Iruñeko periferian sortutako ekimen kultural
ederra eta interesgarria dela iruditzen zaigu. Urtez urte jarraitu dugu, beraz,
plazera da orain bertan ere parte hartzeko aukera izatea.
Txantreako
Brif-braf-brufen ere egon ginen eta
esperientzia ederra izan zen. Antsoaingoa ez da gutxiago izango.
Gure albuma
bertan erosteko aukera ere egonen da.
Bestela ere, gaur egun Txantreako hainbat
dendatan eros daiteke, banaketa guk geuk egina:
- Ezkaba paper denda.
- Izadi
liburu-denda.
- Zazpi okindegia.
Eta aste honetan berean ere Iruñeko
Aldezaharrera iritsiko da (Karrikiri, Katakrak...).
Informatzen jarraituko dugu.
2023ko otsailaren 6a, Gauaren leku ezezagun batetik.