2009/11/28

Auzotegi (eta gainerakoak) defenda ditzagun!

Aurreko gauean gizon uniformatu-armatuak Txantreako Auzotegi Kultur Etxean sartu ziren, ez dakigu zeren bila.
Aspaldidanik Auzotegi auzoko bihotz kulturala da. Bertatik sortu dira kultur ekimen gehienak gure auzoan:olentzeroak, auzoko festak, jubilatuentzako dantzaldiak, erakusketak...
Baita ere, jakina, auzoa defendatzeko sortu diren ekimen gehienak: bialaren kontrako plataforma, kale frankisten aurkakoa...
Nik neuk bi liburu aurkezpena egin dut Auzotegin: Mendeko borroka eta duela gutxi Telebista antenetan atsedena hartzen dute txoriek liburuarena.
Beraz, ozen esan behar dugu Auzotegi defendatuko dugula, gure bihotz kulturala delako eta gure "bigarren etxea".
Abenduaren 12an beste hitzordu bat izanen dugu gure Auzotegin, Txantreako eguna, beraz...

Auzotegi dezagun Txantrea!
Txantrea dezagun Auzotegi!

2009/11/22



2009/11/07

Liburuaren aurkezpena



Telebista antenetan atsedena hartzen dute txoriek liburuaren aurkezpena eginen dugu hurrengo ostiralean, azaroaren 13an, arratsaldeko 8etan, Txantreako Auzotegi kultur etxean.
Liburu berriaren olerki batzuk errezitatzeaz gain Aitzol Lasaren kantek ere udazkeneko giroa berotuko dute.
Aurreko liburuaren (Gerratearen aztarnak) olerki batzuetan oinarriturik hainbat kanta osatu zituen Aitzolek. Kanta horiek entzuteko parada izanen dugu.
Gonbidatuak zaudete!

Asperdura-arratsalde luzeetan
bizi gara
poesiaren lurraldeetatik at,
iraztontzi baten bidez
irazi egiten dugu
poztasunaren esnegaina
bizitza objektuen
biderketa hutsa dela
pentsatzen dugun bakoitzean,
horregatik
itoarazten ditugu gauak
gure malkoen sokekin
eta horregatik
sinatzen ditugu
bizitzaren konbenioan
egunsenti goibeletara
garamatzaten hitzarmenak ere,
egunen batean
salbatuko gaituen greba
hasiko dugulakoan…